नेकपा (एमाले) को ११औं महाधिवेशनअन्तर्गत विराटनगरमा प्रतिनिधि छनोट प्रक्रियामा आज कुटाकुट भएको छ। पार्टी अध्यक्ष केपी शर्मा ओली नेतृत्वको संस्थापन समूह र ईश्वर पोखरेल पक्षधर इतर समूहबीच झडप भएको हो।
विवाद तब सुरु भयो जब एमालेका स्थानीय नेता भानुभक्त पाठक एक व्यक्तिलाई मतदानका लागि लैजाँदा संस्थापन समूहले ‘एकै व्यक्ति पटक–पटक मतदान गर्न आएको’ भन्दै आपत्ति जनायो। दुवै पक्षबीच वादविवाद चर्किँदै गएपछि झडपको रूप लिएको हो।
झडपका क्रममा संस्थापन पक्षका नेता परशुराम बस्नेतमाथि इतर समूहका कार्यकर्ताले हातपात गरेको आरोप छ। बस्नेतमाथि प्रहार गरेको समूह विनोद ढकाल नेतृत्वको ईश्वर पोखरेल निकट पक्षका कार्यकर्ता रहेको बताइएको छ।
घटनापछि केही समय मतदान प्रक्रिया अवरुद्ध भएको थियो। स्थिति नियन्त्रणमा लिन प्रहरी परिचालन गरिएको तर ठूलो क्षति भने नभएको स्थानीय स्रोतले जनाएको छ।
एमाले ११औं महाधिवेशनको प्रतिनिधि छनोटका क्रममा यो पहिलो ठूलो शारीरिक भिडन्त मानिएको छ।
